Wo d Menschhait afoht ummegaffe
Und feststellt, mir sin alles Affe
Isch si us dr Hehli groche
Hett afoh jage, bretle, koche
D Arbet dailt, uff Frau und Ma
Ych fiehr, du kasch dr Hushalt ha
Erfindet s Rad, dr Glaikredit
Dr Pfyl, d Pagode, s Aquavit
S Aquaedukt, dr Föhn, dr Wy
S Baugsetz, s Brot und Let it Be
Als Aendproduggt vo all däm Schaffe
Entwiggle mir is us de Affe
Und luege is als s Beschti a
Wo die Menschhait je het gha
Lut Forscher stammt dr erschti Ma
Aigetlig us Afrika
Dert entstoht, was uns hit präggt
Dr uffrächt Gang, dr Dialäggt
Ohni dä, dät s di au gruuse
Wurdsch hitt no in de Grotte huuse
Au Afrika het profitiert
Vo däm, wo in dr Gschicht bassiert
Me frogt si: Sin dir au drby
Mir mache eych zer Kolonie
Denn hän dr Partner us em Weschte
Das isch fir eych doch s allerbeschte
Dir grieget Pärle, derfet schaffe
Und mr schigge au no Waffe
Luege, was s im Bode git
Und nämme s Schwärmetall grad mit
Dir grieget „Homeland“- Haimetland
Dasch besser als dr Wieschtesand
Mir bringe au dr Glaube mit
Well s dä doch bi eych nit git
Und sin dr glehrig, brav und fromm
Derfe dir zem Unggle Tom
Und schwupps, scho sin sy exportiert
Als Sklave an Missouri gfiehrt
Und alli plünd’re Afrika
Me holt sich, was me hole ka
Eb Tigerfäll, eb Diamante
Ärdeel, Zehn vo Elefante
Goht s um s zahle, blybt me stumm
Die sin doch zem handle z dumm
Speter losch die Länder kheye
Technisch sait me däm befreye
Doch das duet nur ganz sälte grote
S kemme maischtens nur Despote
Bokassa, Amin und Bin Lade
Verseggle sy no Strich und Fade
Und jetz dien Schwarzi Schwarzi bschysse
Wie si s glehrt hän vo de Wysse
Eso hesch s Gfyhl, s foht Afrika
Nonemol vo vorne a
Mir aber sage, hänn die s guet
Well si niemer stresse duet
Dangg Spände kenne sich die maischte
Mänggmol sogar s Netigscht laischte
Verhungere, das ka nit sy
Das isch doch numme Hysterie
Die mache nur bim Faschte mit
Dass es ändlig Fride git
Die dien doch nit verhungere
Nai, numme ummelungere
Die wärde dängg scho iberläbe
Entwiggligshilf isch nur drnäbe
So simmer z fride, fuul und faiss
Was ych nit gseh und ych nit waiss
Goht mi doch am Änd nyt a
Und scho gar nit z Afrika